'Yan adawa za su kauracewa aiki a Kenya

Jagoran 'yan adawa a Kenya daya sha kaye a zaben shugaban kasar Raila Odinga, ya yi ikirarin bayyana matakan gaba da zai dauka bayan zargin yi masa murdiya a zaben shugaban kasar da aka bayyana Uhuru Kenyatta a matsayin wanda ya lashe.

Magoya bayan Jagoran adawa Raila Odinga na ci gaba da nuna kin amincewarsu da nasarar shugaba Uhuru Kenyatta a zaben shugaban kasar Reuters

Odinga ya kuma bukaci magoya bayansa su kauracewa wuraren ayyukansu a ranar litinin don kalubalantar gwamnatin kasar kan zargin kitsa yadda zaben kasar zai kasance da kuma kashe ‘yan-adawa.

Da yake jawabi ga dandazon magoya bayansa a Nairobi babban birnin kasar Odinga ya ce an halaka daruruwan masu adawa da Uhuru Kenyatta a fafutukar neman hakkinsu da suka fito yi, a don haka dole a kauracewa a Gwamnatin.

Wannan dai shi ne karon farko da Raila Odinga ya fito ya yi jawabi ga taron magoya bayansa tun bayyana bayyana shi a matsayin wanda ya sha kaye a zaben.

Matakin dai na zuwa ne a dai-dai lokacin da zanga-zangar kin jinin shugaba Uhuru Kenyatta ke ci gaba da yin kamari a yammacin kasar dama wasu sassa na birnin Nairobi ciki har da Kibera da kuma Mathare lamarin da ya yi sanadin mutuwar kimanin 16.