MDD ta damu da tabarbarewar lamurra a Myanmar

Babban magatakarda na Majalisar Dinkin Duniya Antonio Guterres, ya bayyana damuwarsa kan halin tabarbarewar lamurra a kasar Myanmar, inda ya bukaci kawo karshen matakan soji da gwamnati ke yi kan ‘yan kabilar Rohingya.

Magatakarda na MDD, António Guterres. REUTERS/Lucas Jackson

Yayin jawabinsa ga kwamitin Sulhu, Guterres ya bayyana cewa matsalar Myanmar ta haifar da ‘yan gudun hijira sama da rabin milyan, wadanda suka tsere zuwa Bangladesh, inda ya ke cewa ba za su amince da haka ba.

Shirin kai jami’an Majalisar Dinkin Duniya zuwa Jihar Rakhine da Myanmar don gane wa idanunsu abin da ke faruwa ya rushe, bayan da gwamnatin kasar ta sauya matsayin ta a kai.