Gwamnatin Buhari ta kashe dala biliyan 9 a ayyukan raya kasa

Shugaban Najeriya Muhammadu Buhari ya ce gwamnatinsa ta kashe dala biliyan 9, kwatankacin sama da naira tiriliyan 2 da rabi, wajen aiwatar da wasu ayyukan raya kasa da suka kunshi gina hanyoyi, layin dogo da kuma lantarki a cikin shekaru 2.

Tun bayan hawansa mulki Muhammadu Buhari ya sha alwashin baza komar tattalin arziki da nufin kaucewa dogaro da man fetur da kasar ke yi tsawon shekaru. REUTERS/Afolabi Sotunde

Shugaba Buhari wanda sakataren gwamnati Boss Mustafa ya wakilta, ya bayyana haka ne a wurin taron hukumar bunkasar yawon bude idanu ta Majalisar Dinkin Duniya karo 61, sashin lura da nahiyar Afrika, wanda ya gudana a Abuja.

Shugaba Buhari ya ce shirin bangare ne na yunkurin gwamnatinsa wajen sauya dogaron tattalin arzikin Najeriya daga man fetur, ta hanyar bunkasa, fannonin Noma, hakar ma’adanai, da kuma yawon bude ido.

Taken taron da ya samu halartar wakilan kasashe 53 shi ne kididdiga kan bunkasar sashin bude idanu, a matsayin kashin bayan ci gaban tattalin arziki.