Zanga-zangar zargin magudin zabe ta barke a Zimbabwe

Shugaban kasar Zimbabwe Emmerson Mnangagwa ya bukaci al’ummar kasar su kwantar da hankalin su a dai dai lokacin da ake ci gaba da zanga-zanga a wasu sassan kasar, sakamakon gaza bayyana sakamakon zaben da ya gudana a karshen mako.

Itama Jam’iyyar adawa ta MDC ta yi zargin hadin baki tsakanin jam’iyya mai mulki da hukumar zaben kasar don shirya magudin zabe. REUTERS/Mike Hutchings

Dubban masu zanga-zanga ne suka yi dandazo a ciki da wajen Harare babban birnin kasar bisa zargin aikata magudi a zaben wanda kawo yanzu aka gaza bayyana sakamakonsa.

Tuni dai jami’an tsaro suka fara amfani da hayaki mai sa hawaye dama harsasai don tarwatsa masu zanga-zangar wadda kawo yanzu aka tabbatar da mutuwar mutum guda wanda aka harba har lahira.

Masu zanga-zangar dai na kona hotunan jam’iyyar ZANU-PF mai shugabancin kasar inda cikin karaji suke cewa basa bukatar mayaudara.

Ko a jiya ma dai masu sanya idanu kan zabe na kungiyar Tarayyar Turai EU sun kalubalanci tsare-tsaren zaben na Zimbabwe, wanda ke matsayin na farko a kasar tun bayan dogon mulkin tsohon shugaban kasar Robert Mugabe da ya yi murabus a watan Nuwamba.

Itama dai jam’iyyar adawa ta MDC ta yi zargin hadin baki tsakanin jam’iyya mai mulki da hukumar zaben kasar don shirya magudin zabe.