Saudiya ta soke duk wata tattaunawa da Qatar

Saudiya ta soke gudanar da duk wata tattaunawa da Qatar, bayan a karon farko Sarakunan kasashen biyu sun zanta a jiya kan yadda za su warware sabanin da ke tsakaninsu.

Yariman Saudiya Muhammad Bin Salman, tare da Sarkin Qatar Tamim ben Hamad al-Thani, a wani taro a Doha BANDAR AL-JALOUD / Saudi Royal Palace / AFP

Sarkin Qatar Tamim Bin Hamad al Thani ya zanta ta wayar tarho da Yariman Saudiya mai jiran gado Muhammad bin Salman kan yadda za a warware sabanin da ke tsakaninsu.

Saudiya ta zargi Qatar da kara gishiri kan asalin wanda ya bukaci a yi tattaunawar.

Tattaunawar ta watse ne bayan Saudiya ta zargi wasu kafofin yada labaran Qatar da yada cewa Saudiya ce ta bukaci a yi tattaunawar.

A watan Yuni ne Saudiya da kawayenta manyan kasashen Larabawa suka katse hulda da makwabciyarsu Qatar kan zarginta da taimakawa ta’addanci.