"Mutane miliyan 7 suna mutuwa duk shekara a dalilin gurbatar iska"

Hukumar lafiya ta Majalisar Dinkin Duniya WHO, tace sama da kashi 90% na al’ummar duniya suna shakar gurbatacciyar iska, kuma hakan ke sanadiyyar mutuwar akalla mutane miliyan 7 a kowacce shekara.

Wata katafariyar masana'anta da ke fitar da hayaki a birnin Minsk, na kasar Belarus. REUTERS/Vasily Fedosenko

Sabon rahotan hukumar ta WHO, yace kusan kowane bangare na duniya yana fama da matsalar gurbatar muhalli, amma matsalar tafi muni a yankunan da suke fama da talauci.

Binciken da hukumar ta gudanar, ya duba matsalar gurbatar muhalli ne a waje da kuma cikin gidaje.

Rahotan yace kashi 90 na masu mutuwa sakamakon cutar dake da nasaba da numfashi sun yawa a kasashe matalauta dake Asia da Afirka.

Rahotan yace shakar gurbatacciyar iskar yana haifar da matsalolin da suka kunshi, shanyewar jiki ko sankara, da kuma cutar nimoniya.