Faransa za ta shirya taron addinai a Paris

Shugaban Faransa, Emmanuel Macron da ke kammala ziyarar kwanaki uku a Masar, ya bukaci gudanar da tattaunawa tsakanin addinai domin shawo kan matsalolin tsaro a yankin Gabas ta Tsakiya.

Shugaba Emmanuel Macron na Faransa da shugaba Abdel Fatah al-Sisi na Masar AFP / Ludovic Marin

Shugaba Macron ya bukaci haka ne a ranar karshe ta ziyarar da ya kai Masar da nufin inganta dangantaka da kasar, yayin da ya bayyana damuwa game da take hakkokin bil’adama a kasar.

Macron da Fafaroma Tawadros na II sun jaddada bukataar gudanar da tattaunawa tsakanin addinai a yayin ganawarsu a babbar Majami’ar St. Mark da ta kasance shalkwatan kibdawa.

Macron da ya ziyarci wani karamin cocin da aka kai wa harin ta’addanci a shekarar 2016, ya ce, ya yanke shawarar shirya sabon taro da zai gudana nan da wani lokaci a birnin Paris game da wannan batu, koda yake bai yi cikakken bayani ba.

Wata majiyar diflomasiya ta ce, gwamnatin Faransa za ta karbi bakwancin taron tsirarun addinai a yankin Gabas ta Tsakiya, amma kawo yanzu babu rana ballanta wata.

A bagare guda, Macron ya gana da babban limamin Jami’ar Azhar, Sheik Ahmed al- Tayeb, in da suka tattauna kan horar da limamai a Faransa da kuma yaki da tsattsauriyar akida.

A yayin wannan ziyara dai, Macon da shugana Abdel Fatah al-Sisi sun cimma yarjeniyoyi har guda 30 na biliyoyin Euro da suka shafi bangarorin sufuri da ilimi da kuma lafiya, amma ban da makamai.