An kama Pasto saboda bore a Zimbabwe

Hukumomin kasar Zimbabwe sun kama Pastor Evan Mawarire, daya daga cikin masu shirya zanga- zangar adawa da shugaba Robert Mugabe da aka shirya gudanarwa a yau, inda suke tuhumar sa da laifin tinzira jama’a.

Pasto Evan Mawarira ya shiga hannun hukumomin Zimbabwe kan zargin sa da tinzira jama'ar kasar don yin bore ga gwamnatin Mugabe REUTERS/Philimon Bulawayo

Masu zanga-zangar na bayyana damuwa kan halin tabarbarewar tattalin arzikin kasar da kuma mulkin kama-karyar da suke zargin gwamnatin kasar da yi musu.

A makon jiya an gudanar da irin wannan zanga-zangar wadda ta sa aka rufe shaguna da makarantu da kotuna da wasu ma’aikatun gwamnati.