Turkiya za ta kai dakarunta Afghanistan bayan janyewar Amurka - Erdogan

Shugaban Turkiya Racep Tayyip Erdogan ya ce kasar sa ce kadai za ta iya tabbatar da tsaro a Afghanistan idan Amurka ta kammala janye dakarunta daga kasar.

Shugaban Turkiya Racep Tayyip Erdogan. via REUTERS - MURAT CETÄ°NMUHURDAR/PPO

Erdogan ya bayyana haka ne a yayin da yake shirin ganawa da shugaban Amurka Joe Biden, batun da ya ce za su tattauna akai.

Shugaban na Turkiya ya bada tabbacin cewar a shirye yake ya girke dakarunsa da bada tsaro a filin jiragen sama na Kabul babban birnin Afghanistan, inda ke zama babbar hanyar shige da ficen jami’an Diflomasiyya da ma’aikatan agaji a kasar.

Ranar Asabar kungiyar Taliban ta gargadi kasashen ketare da kada su kuskura su sake girke dakarunsu a Afghanistan bayan janyewar dakarun Amurka da na kungiyar NATO, inda kungiyar ta ce nauyin baiwa ofisoshin jakadancin kasashen ketare da filayen jiragen sama zai koma kan ‘yan kasar ta Afghanistan.