China ta kulle birni mai yawan mutane fiye da miliyan 3

Dokar kullen hana shiga da fita ta fara aiki kan wani birnin kasar China da ke kusa da iyakar Vietnam mai kunshe da mutane akalla miliyan 3 da rabi,  bayan da aka gano mutane fiye da 70 da suka kamu da cutar Korona, cikin kwanaki ukun da suka gabata.

Wasu jami'an lafiya a kasar China. © cnsphoto via REUTERS

Tun bayan samun nasarar dakile yaduwar annobar Korona da ta fara a bulla a cikinta a watan Disambar 2019, kasar China ke cikin shirin ko-ta-kwana don tabbatar da nasarar hana sake bazuwar cutar a yayin da take karbar bakuncin wasannin Olympics na lokacin sanyi a birnin Beijing.

A ranar Lahadin da ta gabata mahukuntan birnin Baise da ke kudancin lardin Guangxi suka sanar da haramta shiga da kuma fita daga cikin birnin, yayin da kuma za a killace mazauna wasu gundumomin da ke karkashin yankin a gidajensu, kamar yadda mataimakin magajin gari Gu Junyan ya shaida wa wani taron manema labarai.

Tun a ranar Juma’ar da ta gabata, mai’aikatan lafiya suka gano wani matafiyi da ya koma gida hutu a matsayin mutum na farko da ya kamu da cutar Korona a birnin Baise, mai tazarar kilomita 100 daga kan iyakar Vietnam.

Tun bayan barkewar annobar a shekarar 2019, China ta gina shingen waya mai karfi a kan iyakarta ta daga bangaren kudanci don hana bakin haure tsallakawa cikinta daga Vietnam da kuma Myanmar domin dakile yaduwar cutar ta Korona.