An samu wani magani da ya nuna alamun warkar da cutar Kansa
Wani Binciken masana kiwon lafiya a kasar Amurka ya bayyana cewar gwajin maganin cutar kansa mai suna Larotrectinib ya nuna alamomin magance wasu nau’oin cutar a tsakanin masu fama da ita daga manyan mutane zuwa masu kananan shekaru.
Wallafawa ranar:
Masana masu binciken sun sanar da samar da maganin ne a wani babban taron cutar kansa da aka kudanar a Amurka.
A taron an bayyana cewa maganin zai taimakawa wajen magance wasu nau’ikan cutar da suka hada da kansar mama da ke barazana ga rayuwar mata.
Binciken ya tabbatar da cewa maganin ya yi aiki ga kashi 76 cikin 100 na masu dauke da nau’in cutar kansa 17, da suka hada da kananan yara da manya.
Sannan kashi 79 daga cikinsu sun rayu a tsawon shekara guda, a yayin da ake ci gaba da gudanar da bincike domin tabbatar da maganin da ake fatar zai warkar da cutar Kansa.
An gudanar da gwajin maganin kan mutane 55 masu dauke da cutar kansa da suka kunshi manya 43 yara kanana 12.
Sai dai hukumar da ke kula da ingancin abinci da magunguna a Amurka ba ta bada izini soma amfani da maganin ba.
David Hyman da ya jagoranci binciken ya ce Maganin zai kasance na farko a duniya da zai kawo sauki a rayuwar manya da kananan yara da ke fama da radadin cutar Kansa.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da mu