An garkame Assange a gidan yarin London

An garkame mamallakin shafin WikiLeaks da ke kwarmata bayanan sirri, Julian Assange a gidan yarin Birtaniya, yayinda ake ganin akwai yiwuwar a tasa keyarsa zuwa Amurka domin fuskantar hukunci saboda fallasa bayanan sirrinta.

Julian Assange lokacin da ya shiga hannun 'yan sandan Birtaniya REUTERS/Henry Nicholls

Wannan na zuwa ne bayan jami’an ‘yan sanda sun cafke Assange da ke samun mafaka a ofishin jakadancin Ecuador da ke birnin London, in da ya kwashe shekaru bakwai yana buya.

Assange mai shekaru 47 kuma dan asalin kasar Australia, ya bayyana a gaban kotu bisa zargin sa da laifin karya sharuddan belinsa a shekarar 2012 a Birtaniya, yayinda yake fuskatar yiwuwar tasa keyarsa zuwa Amurka nan gaba.

Bayan jami’an ‘yan sandan Birtaniya sun kama shi a jiya Alhamis, hukumomin Amurka suka bayyana shirinsu na tuhumrsa kan zargin sa da fallasa bayanan sirrin kasar bayan wani kusten kamfuta.

A halin yanzu ana ci gaba da tsare Assange a gidan yarin Wandsworth da ke kudancin birnin London, in da a can baya ya taba kwashe kwanaki 9 a cikinsa bayan tuhumar sa kan laifin cin zarafin wata mata a Sweden, batun da tuntuni aka ajiye shi.

Kazalika akwai yiwuwar Assange ya fusknci hukuncin daurin shekara guda a gidan yarin na London, yayinda a gefe guda, kotun Westminister za ta sake wani zama a ranar 2 ga watan Mayu mai zuwa domin yanke hukunci kan batun tasa keyarsa.

Kodayake lauyar da ke kare shi, Jennifer Robinson ta ce, za su kalubalanci batun tasa keyarsa zuwa Amurka.