Kasashen Turai sun tafka muhawara kan kwararar 'yan Afghanistan

Ministocin kasashen tarayyar Turai sun tafka muhawara kan yadda za’a shawo kan kwararar ‘yan Afghanistan da suke gujewa zama a kasar karkashin ikon Taliban.Tun bayan karbe iko daga hannun gwamnatin Ashraf Ghani da ‘yan Taliban suka yi jama’ar kasar ke ta kwarara wasu kasashen sakamakon tsoron abinda kaje ya zo.

Wasu daga cikin mayaka 'yan Taliban AFP - WAKIL KOHSAR

Muhawarar wadda Jamus ta jagoranta na da nufin lalubo hanyoyin da za’a bi wajen kare kasashen da ke karbar ‘yan gudun hijirar Afghanistan daga batagarin da ke buya a cikin su.

Haka kuma taron ya mayar da hankali kan tallafawa kasashen da ke karbar bakuncin ‘yan kasar Afghnanistan don samun damar daukar nauyin su.

Wasu daga cikin 'yan kasar Afghanistan AP - Visar Kryeziu

Dawowar Taliban kan mulkin Afghanistan dai ya tayar da hankalin jam’ar kasar wadanda suka rika Tururuwa a filin jirgin saman Kabul don gujewa mulkin Taliban.

Manufar taron itace samarwa da ‘yan gudun hijirar da suka isa kasashen Turai guraren zama da kuma ingantacciyar rayuwa zuwa yadda za’a ga kamun ludayin Taliban inji Ministan cikin gidan Jamus Horst Seehofer.

Pessoas que chegam do Afeganistão se reúnem no ponto de passagem do Friendship Gate na cidade fronteiriça entre o Paquistão e o Afeganistão, Chaman, Paquistão, em 27 de agosto de 2021. REUTERS - SAEED ALI ACHAKZAI

A cewar sa dama Jamus na cikin kasashen da ke karbar ‘yan gudun hijirar wadanda ke barin kasashen su saboda rikice-rikice, inda ya ce a shekarar 2015 kadai Jamus ta karbi ‘yan gudun hijira miliyan 10 mafi yawan su daga Syria.

Seehofer ya ce tunda kasashen turai sun amince da karbar jama’ar Afghanistan to ya zama wajibi su hada kai wajen fitar da tsari na gari cikin hanzari wanda za’a yi amfani da shi wajen inganta rayuwar su.