Kwamitin tsaro na MDD zai sake zaman kada kuri'a kan tsagaita wuta a Gaza

Kwamitin tsaro na Majalisar Dinkin Duniya na zaman tattaunawa a yau Juma’a da zai kai ga kada kuri’ar bukatar tilastawa Isra’ila tsagaita wuta a yakin da ta kaddamar kan al’ummar yankin Gaza na Falasdinu.

Wani yanki da Isra'ila ta sake yiwa luguden wuta a Gaza. AP - Fatima Shbair

Zaman kwamitin na zuwa a dai dai lokacin da Masar ke karbar bakoncin taron ministocin kasashen larabawa 5 da sakataren wajen Amurka Antony Blinken a kokarin samar da mafitar da za ta kai ga tsagaita wutar dindindin a Gazan.

Cikin wata sanarwa da ma’aikatar harkokin wajen Masar ta fitar akwai kyakkyawan fatan cimma yarjejeniyar tsagaita wuta a wannan karon don kawo karshen yakin da ya tagayyara mutane fiye da miliyan guda da rabi baya ga kashe wasu fiye da dubu 32.

Wannan ce ziyara ta 6 da Blinken ke kaiwa yankin gabas ta tsakiya tun bayan faro yakin na Isra'ila a Gaza da ke masana suka bayyana da mafi munin take hakki da kuma kisa marar kakkautawa da duniya ta gani a shekarun baya-bayan nan.

A baya dai an yi mabanbantan tattaunawa da nufin dakatar da yakin amma ba tare da samun nasarar cimma jituwa ba.