‘Yan ta’adda sun kashe dakarun Najeriya 11 tsakanin Kaduna zuwa Birnin Gwari

Akalla dakarun Najeriya 11 ne ‘yan ta’adda suka kashe bayan kwantaon bauna da suka yi musu a babbar hanyar Kaduna zuwa Birnin Gwari, hanyar da aka yi ittifakin tana daya daga cikin hanyoyi mafi hadari a yankin arewacin Najeriya.

Jama'ar kaduna na zanga-zanga sabili da rashin tsaro a yankunan su REUTERS - AFOLABI SOTUNDE

Majiyoyin tsaro sun ce daruruwan ‘yan ta’addan sun yi wa sojojin kwanton bauna ne, inda har ma suka kona motoci masu sulke biyu a ranar Lahadi.

Majiyoyin sun ce bayan dakarun Najeriya sun hango ‘yan ta’addan da dimbim shanu ne suka yanke shawarar tinkarar su, bisa zargin cewa   fashin su suka yi, amma aka yi rashin sa’a ba su ankare cewa ‘yan ta’addan na da yawa ba.

Mataimakin shugaban Najeriya Yemi Osinbajo lokacin da ya ziyarci Kaduna domin jajantawa wadanda harin jirgin kasa ya ritsa da su © Buhari sallau

Jaridar Daily Trust da ake wallafawa a Najeriya ta ruwaito wani mazaunin yankin na cewa da safiyar Litinin ne aka aike da wasu dakaru masu damara yankin don kwashe gawarwakin sojojin da aka kashe, yana mai cewa sai da  shi da kansa ya kirga gawarwakin sojoji 11 da aka zuba a bayan akori kura.

Wasu fasinjojin jirgin kasa dake sufuri tsakanin Abuja da Kaduna a Najeriya. © Daily Trust

Wannan na daya daga cikin hare haren da ‘yan ta’adda da ake wa inkiya da ‘yan bindiga suka kai a jihar Kaduna a ‘yan makonnin nan, inda baya ga harin kusa da filin tashi da saukar jiragen sama na kaduna da ya yi sanadin mutuwar wani jami’in hukumar kula da sararin samaniyar Najeriya, a makon da ya gabata ‘yan bindigar suka kai farmaki kan wani jirgin kasa dauke da fasinjoji a kan hanyarsa daga Abuja zuwa Kaduna, inda suka kashe mutane 9 suka yi awon gaba da wasu da ba a tantance adadinsu ba.