Faransa da Sweden sun sha da kyar, Spain ta yi kuka da Fabregas

A wasannin neman shiga gasar cin kofin Duniya da aka gudanar, Spain mai rike da kofin gasar ta yi kunnen doki ne ci 1-1 da Faransa. An shiga mintinan karshe a kammala wasa ne Olivier Giroud ya barke kwallon da Spain ta zira a ragar Faransa. Sau ra kadan Spain ta lashe wasan sadoba Fabregas ya barar da bugun daga kai sai mai tsaron gida.

Dan wasan Spain Cesc Fabregas a lokacin da ya barar da bugun daga kai sai mai tsaron gida REUTERS/Juan Medina

Wasa tsakanin Jamus da Sweden kuma an tashi ne ci 4-4. Jamus dai ba ta sha da dadi ba domin sai da ta zira kwallaye Hudu a ragar Sweden kafin daga bisani Sweden ta barke kwallayen.

Wasa tsakanin Portugal da Ireland ta arewa an tashi ne ci 1-1. A wasan ne kuma Cristiano Ronaldo ya haska sau 100 a tawagar Portugal.

Wasan Ingila da Poland kuma an dage wasan ne zuwa yau Laraba saboda ruwan sama da aka tabka a birnin Wawsaw.

A yakin Amurka kuma da Caribbean, kasar Amurka ta lallasa Guatemala ci 3-1. Kuma Clint Dempsey dan wasan Tottenham shi ne ya zira wa Amurka kwallaye biyu a raga.

Kasar Jamaica kuma ta doke Antigua ne ci 4-1.

Canada kuma tasha kashi ne ci 8-1 hannun Hunduras. Amma Panama ta yi kunnen doki ne ci 1-1 da Cuba. Costa Rica kuma ta lallasa Guyana ne ci 7-1

Kasashe uku ne de ake bukatar su tsallake zuwa Brazil daga yankin Amurka da Carribiean.

A yankin Asiya kuma Australia ta doke Iraqi ci 2-1, kamar yadda Oman ta doke Jordan ci 2-1. A rukunin B dai kasar Japan ce ke jagorancin Rukunin da maki 10. Amma a wasan sada zumunci Japan din ta sha kashi hannun Brazil ci 4-0 a jiya Talata.