FIFA ta amince da kasashe 48 a gasar kofin duniya

Hukumar kwallon kafa ta duniya ta amince da matakin fadada gasar cin kofin duniya da ake gudanarwa duk bayan shekaru hur-hudu, in da daga shekarar 2026, kasashen duniya 48 za su rika fafatawa a babbar gasar.

Shugaban FIFA Gianni Infantino ne ya gabatar da kudirin fadada gasar cin kofin duniya REUTERS/Arnd Wiegmann

A yau Talata ne mambobin hukumar ta FIFA suka kada kuri’ar amincewa da kudirin wanda shugaban hukumar Gianni Infantino ya gabatar.

Yanzu haka dai za a rika gudanar da jumullar wasanni 80 a gasar a maimakon 64 da aka saba yi, in da kasashe 32 ke fafatawa da juna.

Kazalika za a rika kammala gasar ta cin kofin duniya a cikin kwanaki 32 da zaran an fara aiwatar da matakin.

A karo na farko kenan tun shekarar 1998 da aka fadada gasar cin kofin duniya, abin da zai bai wa kasashen da ba su taba halarta ba a can baya, damar shiga domin a dama da su.