Mun ji kunyar lallasa mu da Bayern Munich ta yi - Vertonghen

A daren Talata, a gasar zakarun nahiyar Turai, Tottenham ta bari Bayern Munich ta yi mata dukan kawo wuka da kwallaye 7 da 2.

'Yan wasan Tottenham suna murnar cin kwallo Reuters

Wannan lamari ya sa dan wasan baya na Tottenham din, Jan Vertonghen ya ce babu abin kunyan da ya kai haka, saboda har gida aka bi su aka antaya musu wadannan kwallaye, kuma dole haka ya hana su bacci.

Da farko dai kamar Tottenham za ta yi rawar gaban hantsi, inda har ta fara jefa kwallo a ragar Bayern, amma sai Bayern Munich din ta nuna kwarewa da rashin tausayi, ta rika antaya kwallaye a ragar Tottenham har sai da suka kai bakwai !