Ingila ta shiga rukunin 'yan dagaji a gasar kasashen Turai

Kocin Ingila, Gareth Southgate ya ce jagorancin babbar tawagar kwallon kafar Ingila wani babban kalubale ne a wannan lokaci mai cike da sarkakiya, kuma ya ce akwai bukatar jajircewa a tattare da ‘yan wasan tawagar.

Kocin tawagar kwallon kafar kasar Ingila kenan, Gareth Southgate AFP

Ingila sun samu koma baya zuwa rukunin ‘yan dagaji a gasar kasashen Turai ta Nations League, bayan da Italiya suka lallasa su da ci 1 mai ban haushi ranar Juma’a a birnin Milan.

Za su fafata da Jamus a ranar Litinin din nan, bayan da suka buga wasanni har 5 ba tare da nasara ba a karon farko tun shekarar 2014.

Southgate ya ce haka lamarin yake wani lokaci, kuma ba shi ne koci na farko da ya taba jagoranatar tawagar a lokaci mai cike da jarawaba irin wannan ba.