Brazil a shirye ta ke ta karbi bakuncin gasar cin kofin duniya - Blatter

Hukumar kwallon kafar duniya ta FIFA, ta kebe ran 6 ga watan Disambar wannan shekara a matsayin ranar da za a kasafta kungiyoyin kwallon kafar kasashen duniya a cikin rukunansu, domin karawa a gasar cin kofin duniya da za a yi a Brazil a shekara mai zuwa. 

Shugaban hukumar kwallon kafa ta duniya FIFA, Sepp Blatter REUTERS/Stringer

Shugaban hukumar ta FIFA, Sepp Blatter ne ya bayyana hakan, inda ya ce za a yi taron zaben kasafta kasashen ne a Jihar Bahia dake kasar ta Brazil.

Haka zalika, Blatter ya kore rade-radin da ake yi dake cewa kasar ta Brazil na samun cikas wajen kammala shirye-shireynta na daukan bakuncin gasar.

Ya kuma kara da cewa ire-ire kalubalan da kasar ke fuskanta game da shirye shiryen, abu ne da kan faruwa ga duk wata kasa da za ta dauki bakuncin gasar.