rfi

Saurare
  • Labarai Kai-tsaye
  • Labaran da suka gabata
  • RFI duniya
  • 'Yan takarar neman kujerar mataimakin shugaban kasa a Najeriya na tafka muhawarar kai tsaye ta gidan talabijin

Najeriya Maiduguri BOKO HARAM Ta'addanci

wanda aka wallafa • Wanda aka canza zuwa

Mayakan Boko Haram sun kone gonakin shinkafa a Borno

media
Wasu daga cikin 'yan gudun hijira mata da yara da rikicin Boko Haram ya raba da muhallansu, yayin kokarin diban ruwa a sansaninsu na Muna dake Maiduguri. 1/12/2016. REUTERS/Afolabi Sotunde

Mayakan Boko Haram sun kone wasu gonakin shinkafa a kauyen Zabarmari da ke karamar hukumar Jere ta jihar Borno, lamarin da ya haddasa tafka hasarar daruruwan buhunan shinkafa da aka noma a daminar bana.


Malam Hassan Zabarmari shi ne shugaban manoman da matsalar ta shafa, wanda ya shaidawa sashin Hausa na RFI cewa yawan hasarar da suka yi ta wuce matakin kayyadewa sai dai kawai su kiyasta.

A cewar Hassan Zabarmari mayakan na Boko Haram sun kone sama da kadada ko fadin kasar da ya zarce eka 250 na gonaki.

Shugaban manoman ya ce akwai bukatar gwamnati ta gaggauta kawo musu dauki la’akari da halin kuncin da harin kone musu gonakin ya jefa su.

Muryar Malam Hassan Zabarmari shugaban manoman da 'yan Boko Haram suka konewa gonaki 04/12/2018 - Daga Nura Ado Suleiman Saurare

A karshen watan Nuwamba mayakan Boko Haram kai hari kan wasu gonaki inda suka kashe manoma guda 4 a kauyen Ali Gamarguri lokacin da suka same su suna aiki.

Harin dai ba shi ne na farko da mayakan Boko Haram ke kaiwa manoma ba, kasancewar a tsakiyar watan na Nuwamba, sun hallaka manoma 9 tare da sace wasu 12 daga kauyen Mammanti dake gaf da birnin Maiduguri.