Shugaba Buhari na shirin tafiya London a yau

A wannan Alhamis shugaban Najeriya Muhammadu Buhari zai yi tafiya zuwa Birtaniya bayan kammala ziyara a birnin Maiduguri na jihar Borno.

Shugaba Muhammadu Buhari da mukarrabansa a filin tashi da saukar jiragen sama a Abuja RFI Hausa/Sadou

Mai maitamaka wa shugaban na musamman kan kafafen yada labarai, Femi Adesina ya bayyana haka a cikin wata sanarwa da ya fitar a safiyar yau.

A ziyarar ta zai kai jihar Borno wani lokaci a yau, ana saran shugaban ya kaddamar da wasu ayyukan ci gaban al’umma musamman a bangaren ilimi da kiwon lafiya da kuma hanyoyi.

Wasu bayanai na cewa, a yayin ziyararsa a London, shugaban zai yi nazari game da sabbin Ministocin da zai yi aiki da su a sabuwar gwamnatinsa.

Bayan kammala ziyarar a Borno, shuganban zai kama hanya zuwa Birtaniya, yayinda ake saran dawowarsa Najeriya a ranar 5 ga watan Mayu mai zuwa.

Ko a ranar Laraba, sai da shugaban ya kai ziyara birnin Lagos domin kaddamar da wasu manyan ayyukan da gwamnatin jihar ta yi.