Wasannin neman gurbin shiga gasar kofin duniya na 2018

A yanzu dai babu tabbas idan har kasar Argentina za ta samu damar zuwa gasar neman kofin kwallon kafa na duniya da za a yi shekara mai zuwa a kasar Rasha, bayan da a cikin dare jiya kasar ta tashi canjaras a karawarta da Peru ba wanda ya zura kwallo a ragar wani duk da cewa an yi wasan ne a gidan Argentina.

Messi a filin wasan lokacin karawar Argentina da Peru REUTERS/Agustin Marcarian

Bayan wasan na jiya, a yanzu Argentina na can ne a matsayin ta 6 cikin jerin kasashen Kudancin Amurka da ke wannan yunkuri, kuma kasashe 4 na farko ne kawai ke da tabbacin shiga gasa, yayin da ya rage zagaye daya a nan gaba domin kammala fafatawa tsakanin kasashen yankin.

Idan Argentina ta gaza zuwa gasar ta neman kofin duniya a Rasha, wannan zai kasance na farko a cikin shekaru 47.

Ita ma Colombia ta sha kashi ne a karawarta da Paraguay, abin da ke nufin cewa dole ne kasar ta Colombia ta yi nasarar doke Peru a karawar da za su yi nan gaba kafin ta samu shiga wannan gasa da za a yi a kasar Rasha.

Wani wasan da ya bai wa masu shawarar kwallon kafa mamaki a yankin na Kudancin Amurka shi ne wanda aka yi tsakanin Uruguay da Venezuela, wasan da aka tashi ba wanda ya zura kwallo a ragar wani, to sai dai duk wannan sakamako, Uruguay na da kwarin gwiwar samun damar zuwa Rasha a badi.

Yankin Turai

Jamus ta samu gurbin shiga gasar ta neman kofin duniya, bayan da ta lallasa Ireland a karawar da suka yi cikin daren alhamis ci 3-1. Jamus dai ita ce ke rike da kofin gasar da aka buka a kasar Brazil

Wata kasar da ta yi nasarar zuwa gasar neman kofin na duniya ita ce Ingila, bayan da da kyar da jibin goshi ta doke Slovenia ci 1 mai ban haushi. Ingila ta yi nasara ne ana gaf a ta shi wannan wasa da aka buga a birnin London.

A wannan juma’a kuwa Spain ce ke shirin fafatawa da Albania, karawar da wasu ke ganin cewa abu ne mai sauki ga Spain din ta yi nasarar doke Albania.