India na fuskantar bala'in yanayin zafi da ya wuce kima

Yau asabar yanayin zafi ya karu matuka a India, fiye da ko yaushe a tarihin kasar, bayanda yanayin zafin a ma’aunin Celsuis ya kai kusan digiri 50.

Ma'aikatar hasashen yanayin kasar India ta gargadi mutane da kaucewa fita har sai rana ta yi sanyi, gudun fuskantar hasarar rayuka. REUTERS/Ajay Verma

Lamarin dai ya jefa ‘yan kasar da dama cikin fargabar fuskantar matsanancin karancin ruwa. La’akari da cewa sai nan ranar 6 ga watan Yuni ake sa ran ruwan sama zai soma sauka.

Ma’aikatar hasashen yanayi kasar ta India tace a jihar Rajasthan, yanayin zafin ya kai digiri 49.6 a ma’aunin Celsius, yayinda kuma a sauran jihohi da dama dake yammaci, arewaci da kuma kudancin kasar, yanayin zafin ya kai matakin digiri 47 a ma’aunin na Celsuis.

A babban birnin kasar New Delhi, ma’aikatar hasashen yanayin ta gargadi mutane da kaucewa fita har sai rana ta yi sanyi, gudun fuskantar hasarar rayuka.

A jihar Maharashtra kuwa da ke dake yammacin kasar, rahotanni sun ce tuni manoma suka soma fuskantar bala’in karancin ruwa a gonaki, saboda kafewar tafkuna, koguna, da sauran wuraren da ruwa ke taruwa.

A watan Mayu daya gabata, masana hasashen yanayi suka yi gargadin cewa kashi 40 na fadin kasar India ne zai fuskanci bala'in fari a bana.