An shiga rana ta biyu a Zaben Masar

A kasar Masar, an bude runfunan zabe a rana ta biyu a zaben shugaban kasa na farko mai dimbin tarihi domin zaben wanda zai gaji Hosni Mubarak wanda zanga-zanga ta yi awon gaba da shi a bara. Wannan Zaben shi ne zai kasance mizanin ci gaban kasar. 

Wasu mata 'Yan kasar Masar suna kada kuri'arsu a runfar zabe a birnin Al kahira. Reuters/Ammar Awad

Miliyoyin al’ummar Masar ne suka fara kada kuri'a a rana ta biyu.

Da misalin karfe 8:00 na Safe Agogon kasar ne aka bude runfunan zabe

Ana sa ran a samu yawan masu kada kuri’a a rana ta biyu fiye da jiya Laraba da aka fara zaben bayan gwamnatin kasar ta bada hutu ga ma’aikata domin kada kuri’arsu.

A rana ta farko, an gudanar da zaben cikin lumana kodayake an samu wasu kurakurai da masu sa ido suka ce sun gani.

Wannan shi ne zaben farko a Tarihin Masar.

Ana sa ran masu kada kuri'a miliyan 50 ne za su kada kuri’ar zaben shugaban kasa tsakanin ‘Yan takara goma sha Biyu masu neman kujerar.