Kwararru sun gano akwanin nadar bayanai na Air Algerie

Kwararru da ke aikin binciken sanadin faduwar jirgin Algeria a kasar Mali sun sake gano akwatin nadar bayanai na biyu daga cikin tarkacen jirgin a inda ya tarwatse. Akwai wata tawagar kwararru da zasu isa inda jirgin ya fadi a yau Assabar domin gano musabbabin faruwar hadarin jirgin wanda ya taso daga Burkina faso zai nufi kasar Algeria.

jirgi mai saukar Angulu yana isa inda jirgin Algeria ya fadi a Mali . Reuters/ECPAD

Jirgin wanda ya fadi a yankin kasar Mali yana dauke ne da mutane 118, kuma babu wanda ya rayu a cikinsa.

Kasar Faransa ta ware kwanaki uku domin zaman makokin wadanda suka mutu a hadarin jirgin inda mutane 54 a cikin jirgin Faransawa ne.

Sanarwar da ta fito daga fadar shugaban kasa tace Daga Ranar Litinin, za’a sassauta tutar kasar zuwa kasa har zuwa kwanaki uku na zaman makokin.