An cafke Ntaganzwa na Rwanda da ake nema ruwa a Jallo

Majalisar dinkin duniya ta sanar da cafke 1 daga cikin mutane 9 da ake nema ruwa a jallo, kuma tsohon Magajin gari a kasar Rwanda bisa zargin hannu a harin kisan kiyashi da ya hallaka duban mutane a shekarar 1994 a kasar.

Dakarun wanzar da zaman lafiya na Majalisar Dinkin Duniya a Rwanda AFP PHOTO / Pacome PABANDJI

Ladislas Ntaganzwa wanda Amurka ta sanya tukuici dala miliyan 5 ga duk wanda ya taimaka wajen cafke shi, za a tuhumi shi ne kan laifukan yaki da keta hakkin bil’adama.

Akalla mutane dubu 800 mafi yawa kabilar Tutsi aka kashe a yakin tsawon kwanaki 100 da aka yi a kasar da Hutus.

Mai shigar da kara a Rwanda Richard Muhumuza ya ce bayan laifukan Yaki ana zargi Ntaganzwa da aikata fyade da lalata da mata da dama.