Nakiya ta raunata dakarun Majalisar Dinkin Duniya 7 a Mali

Dakarun wanzar da zaman lafiya 7 sun ji rauni a tsakiyar Mali a ranar Juma’a, lokacin da motarsu ta taka nakiya da aka samar a gida, a cewar tawagar kiyaye zaman lafiya ta majalisar dinkin duniya.

Wani sojan Faransa na rundunar Barkhane yayin sintirin kakkabe 'yan ta'adda a garin Tin Hama dake kasar Mali, ranar 19 ga watan Oktoban 2017. © REUTERS/Benoit Tessier/File Photo

Rundunar kiyaye zaman lafiyar ta Majalisar Dinkin Duhniya ta wallafa  a shafinta na Tweeter cewa nakiyar ta fashe a karkashin motar da dakarun ke ciki ne,  a yayin da suke kan hanyar zuwa Diallo, a tsakiyar yankin Mopti.

Ba a bayyana kasashen wadanda lamarin ya rutsa da su ba.

Tun daga shekarar 2012 ne ‘yan aware da masu ikirarin jihadi a arewacin Mali suka jefa kasar cikin tashin hankali da ya yi sanadin mutuwar dubban farar hula da mayaka, duk kuwa da taimakon kasa da kasa.