Rikicin Sudan ya sauya salo bayan arangamar 'yan sanda da masu zanga-zanga

Rikici ya sake barkewa a tsakar birnin Khartoum na Sudan yau Alhamis kwana guda bayan jami’an tsaro sun kashe masu zanga-zanga 15 a wani yanayin tashin hankali da kasar ke ci gaba da gani tun bayan sake karbe ikon sojoji a ranar 25 ga watan jiya.

Yadda zanga-zanga ke ci gaba da tsananta a Sudan. - AFP

Daga daren jiya laraba ne rikicin ya faro bayan da jami’an tsaron suka rika harba hayaki mai sanya hawaye kan masu zanga-zangar adawa da mulkin Soji a arewacin birnin na Khartoum fadar gwamnatin Sudan da nufin tarwatsa su, sai dai kuma zanga-zangar ta juye zuwa rikici tare da sake yin muni a yau.

Bayanai sun ce a yau alhamis jami’an tsaron sun kara matse yankin da masu zanga-zangar ke bore ta hanyar kara shingaye don nufin hanasu fadada boren zuwa wasu yankuna.

Tuni dai matakin jami’an tsaron na Sudan kan masu zanga-zangar da ya kai ga kisan mutane 15 ya haddasa caccaka daga kasashen duniya kan gwamnatin kasar dai dai lokacin da rikicin ke ci gaba da munana.

Masu zanga-zangar Sudan. - AFP

Yayinda jami’an tsaro ke ci gaba da harba hayaki mai sanya hawaye don tarwatsa jama’a, a bangare guda mutanen da ke cikin gangamin na amfani da duwatsu wajen mayar da martini ga jami’an.

Rahotanni sun ce mutanen da ke cikin zanga-zangar ta yau ya ninka wadda aka gani a baya, yayinda gwamnati ta yi umarnin girke tarin jami’an tsaro don hana su tasiri.

Yadda masu zanga-zangar ke ci gaba da haduwa a dandali. - AFP

Tun daga ranar 25 ga watan Oktoba ne Sudan ta fara ganin sabon tashin hankalin bayan da Janar Abdel Fattah al-Burhan da ke cikin juyin mulkin 2019 da ya hambarar da shugaba Omar al-Bashir ya kawar da shugabannin fararen hular da ke jagorancin kasar tare da sanya dokar ta baci.