‘Yan sanda tara ne aka kashe a wani harin kwanton bauna a Somaliland

A Somaliland an kaiwa ‘yan sanda 9 harin kwanton bauna tare da kashe su bayan wata musayar wuta da aka yi,yankin da ya ayyana ‘yancin kai a Somaliya.

Birnin Hargeisa, babban birnin Somaliland AFP - EDUARDO SOTERAS

Lamarin ya faru ne tsakanin jami’an tsaro da ‘yan tawaye masu dauke da makamai a jiya  Juma'a a wani yanki mai tsaunuka mai tazarar kilomita 95 daga babban birnin yankin Hargeysa, in ji kwamandan 'yan sanda Mohamed Adan Saqadhi.

Taswirar yankin Somaliland © RFI

 'Yan bindigar "sun yi wa 'yan sanda 30 kwantan bauna kuma sun kashe tara", in ji Saqadhi, ya kara da cewa 'yan sanda 17 sun jikkata.

 A shekarar 1991 wani tsohon yanki na Birtaniya, Somaliland ya ayyana  kansa a matsayin yanki mai cikkaken ‘yancin kai daga Somaliya, yayin da wannan kasa ta fada cikin rudani da har yanzu ta kasa kawo karshen sa.

Wasu daga cikin mutanen Somalia AP - Jerome Delay

Tun a watan Yuli ne mahara suka dauki makamai domin nuna adawa da karin wa'adin da shugaban kasar Somaliland, Muse Bihi Abdi ya yi a watan Oktoban da ya gabata. Hukumar zaben Somaliland ta sanar a watan da ya gabata cewa za a gudanar da zabe zaben shugaban kasa a watan Nuwamba na shekarar 2024 , watanni 11 bayan zaben fidda gwani na jam'iyyar.