ISIS ta kashe mutane fiye da 100 a Syria

Akalla mutane 101 ne suka rasa rayukansu sakamakon munanan hare haren da kungiyar ISIS ta kaddamar a sansanonin sojojin Syria a wannan Litinin.

Kungiyar ISIS ta dauki alhakin kashe mutane 101 a Syria SANA/Handout via Reuters

Kungiyar da ke sa ido kan hakkin dan Adam a Syria ta ce, mayakan sun kai harin farko  a birnn Jableh, inda nan take suka kashe mutane 53 yayin da hari na biyu da aka kai a birnin Tartus ya lakume rayuka 48.

Rahotanni sun ce, wannan dai, shi ne farmaki mafi muni da aka kai a biranen tun bayan da Syria ta fada cikin rikici a shekara ta 2011.

Jim kadan da aukuwar lamarin ne, kungiyar ISIS mai da’awar jihadi ta sanar da daukan alhakin hare haren na kunar bakin wake.