Hare-haren Rasha a kudancin Ukraine sun hallaka mutane 4

Wasu hare-hare da Rasha ta kai yankin Kherson  da ke kudancin Ukraine cikin sa’oi 24, sun kashe mutane 4 da raunata 9, kamar yadda hukumomin yankin suka tabbatar.

Shugaban Ukraine Volodymyr Zelensky, yayi Allah wadai da harin Rasha wanda ya kashe mutane 4 a Kharson. AFP - -

Gwamnan yankin Oleksandr Prokudin ya ce daga jiya asabar zuwa yau lahadi, Rasha ta kai hare-hare 71 wanda suka fada kan gidajen mutane da asibitoci da kuma makarantu.

Prokudin ya ce daga cikin wadanda suka rasa rayukansu, akwai mai shekara 87 da matarsa mai shekara 81, sannan masu aikin ceto suka gano gawar wani a karkashin burabuzai.

Shugaban kasar Volodymyr Zelensky yayi Allah wadan da harin da ya kira dana ta’addanci, wanda ake kaiwa don salwantar da rayuka da lalata kayan gwamnati.

Zelensky ya ce da zarar an dakatar da kai hare-haren, za a gaggauta gyara wutar lantarkin yankin don al’umma su rinka samun dumi.