Madrid zata kara da APOEL, Benfica zata kece raini da Chelsea

A yau Laraba ne Real Madrid zata karbi bakuncin APOEL Nicosia ta Cyprus a Filin wasa na Santiago Bernabeu, Kungiyar Benfica kuma zata nemi rama kwallon da Chelsea ta zira a ragarta a Stamford Bridge.

Dan wasan Chelsea Branislav Ivanovic a lokacin da yake murnar zira kwallo a ragar Aston Villa a gasar Premier ta Ingila REUTERS/Toby Melville

Kocin Madrid, Jose Mourinho yace babu wani sauyin ‘Yan wasa da zai yi a wasan wai don Madrid tana da kwallaye uku a ragar APOEL.

A karshen mako ne Real Madrid zata kace raini da Valencia a Bernabeu kuma ana hasashen Mourinho zai iya ajiye zaratan ‘Yan wasan shi don gudun kada ya barar da maki saboda hamayyar shi da Barcelona a La liga.

Mourinho yace APOEL tana iya zira kwallaye hudu a ragar Madrid don haka ya zama dole Madrid ta iyar da aikinta.

Idan dai Madrid ta tsallake zagayen kusa da karshe zata kara ne Bayern Munich.
A yau ne kuma Kungiyar Chelsea tilo daga Ingila zata kara da Benfica a Stamford Bridge.

A wasan farko Chelsea ta zira kwallo daya mai ban haushi a ragar Benfica.

Amma kocin Benfica Jorge Jesus yace kwallon da Chelsea ta zira a raga sa’a ce, domin yace ya yi imanin zasu lallasa ‘Yan wasan “The Blues” a yau Laraba.

Amma kocin Chelsea Di Matteo ya bukaci ‘yan wasan shi buga kwallo kamar yadda suka yi waje da Napoli ta kasar Italia.