Manchester City ta lashe Community Shield

Manchester City ta lashe gasar Community Shield ta Ingila bayan ta casa Chelsea da kwallaye 2-0 kuma Sergio Aguero ne ya jefa dukkanin kwallayen a ragar Chelsea, abin da ya sa aka bayyana shi a matsayin gwarzon wasan na ranar Lahadi.

Sergio Aguero ya taimaka wa Manchester City wajen lashe gasar Community Shield Reuters/John Sibley

Aguero ya jafa kwallon farko ne a minti na 13 kuma ita ce kwallo ta 200 da ya ci wa Manchester City a tarihi, yayin da ya jefa ta biyu a minti na 58 bayan dawowa daga hutun rabin lokaci.

Chelsea a karakshin sabon kocinta, Maurizio Sarri, ta rasa samun damar  kaddamar da hare-haren kwallaye a wasan, yayin da sau daya tal ta kaddamar harin cin kwallo mai kyau ta hannun Callum Hudson-Odoi amma Claudio Bravo da ke tsaren ragar Manchester City ya kade kwallon.

An yi fafatawar ce a filin wasa na Wembley kuma a cikin tsananin yanayi na zafi, lamarin da ya sa ‘yan kallo jika kyallaye ko kuma tawul-tawul da ruwa don sanyaya jikinsu.