Barcelona za ta hadu da Napoli a Europa bayan ficewa daga gasar zakarun Turai

Barcelona za ta fafata da Napoli a wasan gasar Europa bayan da kungiyar ta rikito daga babbar gasar zakarun Nahiyar Turai ta Champions League a karon farko tun bayan kakar wasa ta 2000 zuwa 2001.

Barcelona za ta yi kokarin ganin ta lashe gasar ta Europa don huce haushinta ficewarta daga gasar zakarun Turai. Christof STACHE AFP/File

Kungiyar, a karkashin mai horarwa Xavi Hernandez za ta ci gaba da gwabzawa a wannan karamar gasar ta zakarun Turai, inda duk wadda ta yi  nasara tsakaninta da Napoli za ta wuce zagayen kungiyoyi 16.

Daraktan kwallon kafa na kungiyar Bracelona Mateu Alemany, ya ce lallai Napoli babbar kungiya ce, kuma  ‘yan wasanta sun san makaman aiki a fagen tamaula, saboda haka wasan zai yi matukar wahala.

Za a yi zubin farko na wasan ne a filin wasan Barcelona na Camp Nou a ranar 17 ga watan Fabrairun shekarar 2022, sannan Barcelona ta mayar da biki a ranar 24 ga Fabrairun a filin wasan Diego Armando Maradona da ke birnin Naples, wato filin Napoli kenan.

Kungiyoyin  biyu sun taba haduwa a zagayen kungiyoyi 16 a gasar zakarun nahiyar Turai ta Champions League a kakar wasa ta 2019-20, inda Barcelona ta yi  waje road da Napoli 4-2 jimilla.