Eguavoen ya ajiye aikin rikon kwaryar horas da Super Eagles

Augustine Eguavoen ya ajiye mukaminsa na kocin rikon kwaryar tawagar kwallon kafar Najeriya ta Super Eagles.

Augustine Eguavoen da ya jagoranci 'yan wasan Najeriya a gasar cin kofin kasashen nahiyar Afrika a Kamaru. © DANIEL BELOUMOU OLOMO/AFP

Eguavoen ya ajiye aikin ne, bayan da Super Eagles ta fice daga gasar cin kofin kasashen Afirka, bayan rashin nasara a karawarsu da Tunisia da ci 1-0 a zagayen gasar AFCON na biyu jiya Lahadi a Kamaru.

Kocin dai ya jagoranci tawagar ‘yan wasan Najeriya lashe wasanni 3 jere da juna a matakin rukuni, inda suka fara da doke Masar da 1-0, Sudan da 3-1, sai kuma doke Guinea-Bissau da 2-0, kafin su sha kaye a fafatawarsu da Tunisia.

Eguavoen ya karbi rikon kwaryar horas da Super Eagles bayan da hukumar kwallon kafar Najeriya ta kori kocin ‘yan wasan kasar Gernot Rohr a watan jiya, inda ta sanar da Jose Peseiro na kasar Portugal kuma tsohon kocin kungiyar FC Porto a matsayin sabon koci na dindindin da zai fara aiki bayan gasar cin kofin kasashen Afirka.