Hollande ya kulla yarjeniyoyi da al-Sisi

Shugaban Faransa Francois Hollande ya kulla yarjeniyoyi da dama da takwaransa na Masar Abdel Fatah al Sisi a ziyarar kasae da ya kai wadda ta gamu da suka daga kungiyoyin kare hakin bil Adama.

Shugaban Masar Abdel Fatah al- sisi da takwaransa na Faransa, Francois Hollande REUTERS/Etienne Laurent/Pool

Shugaba Hollande da Abdel Fatah al- Sisi sun jagoranci sanya hannu kan yarjeniyoyi da dama, cikin su har da na Euro sama da biliyan guda don fadada hanyoyin jirgin kasa a birnin Alkahira.

A taron da suka yi da manema labarai, shugabanin biyu sun yi bayani kan zargin cin zarafin bil Adama da ake yi wa shugaban na Masar, inda al-Sisi ya ce Hollande ya tabo maganar a ganawar da suka yi, inda ya shaida masa cewar yankin da Masar ta ke na fama da tashin hankali.

Al- Sisi ya ce bai dace ace za ayi amfani da mizanin kwatanta ‘yancin bil Adama a Turai da yadda abin yake a kasashen dake fama da tashin hankali irin su Masar ba.

A nashi jawabi, shugaba Hollande wanda ya samu kyakyawar tarba daga mai masaukin nasa ya ce, kare hakkin bil Adama ba zai zama tarnaki wajen yaki da ta’addanci ba.