Shugaban Brazil ya sanya hannu kan dokar mallakar bindiga

Sabon Shugaban kasar Brazil Jair Bolsonaro ya sanya hannu kan wata doka wadda zata saukaka yadda ake mallakar bindiga a cikin kasar, matakin da masu sa ido ke kallon cewar zai dada haifar da matsalar tsaro.

Jair Bolsonaro sabon Shugaban kasar Brazil Reuters/路透社

Shugaba Bolsonaro yace dokar zata baiwa yan kasa na gari damar mallakar bindiga domin kare kan su daga mahara.

Kasar Brazil ta gamu da kisan kai har sau 64,000 a shekarar 2017, abinda ya mayar da kasar daya daga cikin kasashen da suka fi hadarin zama a duniya.

Wata kididdigar bankin duniya ta ce, Brazil ce kasa ta 8 a duniya da aka fi kisan kai, yayin da, hukumomin tsaron kasar suka ce a shekarar 2017 an aikata kisan gilla dubu 63 da 883 a fadin kasar.

Shugaban kasar Jair Bolsonaro da tsohon kaftin din sojin Brazil mai ra’ayin rikau, Jair Bolsonaro ya lashe zaben shugaban kasa da aka gudanar a karshen makon watan Oktoba na shekara ta 2018, in da ya doke abokin takararsa Fernando Haddad da sama da kashi 55 na kuri’un da aka kada.