FIFA ta ci tarar kasashen Afrika

Kasashen Afrika na fuskantar fushin hukumar kwallon kafa ta duniya FIFA sakamakon saba dokokin hukumar a wasannin neman shiga gasar cin kofin duniya da za a yi a Rasha a 2018.

Shugaban FIFA Gianni Infantino AFP

Amfani da dan wasan da bai dace ba da Gabon ta yi ya sa an ba Cote d’Ivoire nasara ci 3-0 akan Gabon.

Sannan an ci tarar Gabon kudi dala dubu shida da dari biyu.

FIFA ta ci tarar Najeriya kudi dala dubu talatin kan yadda ‘yan kallo suka fantsama a Uyo a wasan da Najeriya ta doke kamaru ci 4-0.

Jamhuriyar Congo za ta biya tarar kudi dala dubu 20 kan hargitsin da ya faru a lokacin da ta karbi bakuncin Tunisia a Kinshasa da suka tashi ci 2-2.

FIFa ta ci tarar Mali kudi dala dubu 15 saboda yadda ’yan kasar suka dinga fasa kwalabe da wurgo kujeru a fili a lokacin da ‘yan wasan kasar ke fafatawa da Morocco.

Sannan FIFA ta yi gargadi ga Senegal da Burkina Faso kan tsaikun soma wasa da suka yi a karawar da suka yi a Dakar da kuma Ouagadougou.

Tarar kudin dai babban kalubale ne ga kasashen na Afrika musamman diba da yadda hukumomin kwallon kasashen ke kai kawo wajen samun kudi daga gwamnatocin kasashensu.