Bayern Munich ta lallasa Frankfurt da kwallaye 5-0

Kungiyar Bayern Munich ta lashe gasar Super Cup ta Jamus bayan da ta lallasa Eintracht FrankFurt da kwallaye 5-0.

Robert Lewandowski na kungiyar Bayern Munich. REUTERS/Michaela Rehle

Dan wasan gaba na kungiyar ta Bayern Munich, kuma dan kasar Poland Robert Lewandoski ne ya ci wa kungiyar tasa 3 daga cikin kwallayen biyar da suka jefa a ragar Frankfurt, yayinda Kingsley Coman da Thiago Alcantara suka jefa ragowar kwallaye biyun.

Nasarar da Munich ta samu, a wasan na ranar Lahadi, tamkar ramuwa ce kan wasan karshe na gasar Super Cup din ta Jamus a kakar bara, inda Frankfurt ta doke ta da kwallaye 3-1.

A kwanakin baya dai akwai shakku kan ci gaba da zaman Robert Lewandoski a kungiyar ta Bayern Munich, inda aka rika alakanta dan wasan da sauyin sheka zuwa wasu kungiyoyin nahiyar Turai ciki har da Real Madrid.