PSG ta kulla yarjejeniya da Fabian Ruiz na Spain daga Napoli

Dan wasan tsakiya na kasar Spain, Fabian Ruiz ya koma kungiyar kwallon kafa ta Paris Saint-Germain da taka leda daga Napoli kan yarjejeniyar shekaru biyar.

Fabian Ruiz na Napoli daga hagu, bayan nasarar zura kwallo a ragar Inter Milan a San Siro. AFP

Dan wasan dai shi ne na biyar da PSG ta kulla yarjejeniya da shi a baya bayan nan domin karfafa bangaren tsakiyarta bayan zuwan ‘yan wasan Portugal biyu wato Vitinha da Renato Sanches dukkaninsu a cikin wannan kaka.

Fabian mai shekaru 26 ya shafe shekaru hudu tare da Napoli, inda ya yi nasarar lashe mata kofin Italia a shekarar 2020.

Akwai dai kyakkyawan fatan Fabian ya taimakawa tsakiyar PSG musamman dai dai lokacin da kungiyar ke fatan ganin ta yi rawar gani a wasannin gasar cin kofin zakarun Turai na kakar da muke ciki, bayan rikitowarta a wasannin gab da na karshe na kakar da ta wuce.