‘Yan sanda Biyu sun mutu a Zanga-zangar kasar Kenya

An samu mutuwar ‘Yan Sanda guda Biyu a zanga-zangar da matasa ke yi a birnin Mombasa na kasar Kenya bayan kai wani harin gurneti. Jami’an tsaro a kasar suna kokarin kwantar da zanga-zangar da aka shiga kwanaki biyu bayan kashe wani malamin addini Aboud Rogo Mohammed.

'Yan Sandan kasar Kenya suna fito na fito da masu Zanga-zanga

Zanga zangar a jiya Talata ta yi sanadiyyar mutuwar wani Dan Sanda tare da raunata wasu da dama, bayan da aka harba gurneti a motar ‘Yan Sandan.

Ofisoshin jakadancin kasashen waje, da suka hada da Faransa da Australia da Birtaniya, sun gargadi turawan kasarsu gujewa yin tafiya zuwa birnin na Mombasa.