Gwamnatin Sudan da ‘Yan tawaye sun yi yarjejeniyar tsagaita wuta

A wata sasantawa da aka yi a birnin Doha dake kasar Qatar, kasar Sudan da ‘Yan tawayen kasar na kungiyar JEM, sun saka hanu a wata yarjejeniyar tsagaita wuta, wacce ta fara aiki a daren Jiya Lahadi, kamar yadda kafofin yada labaran kasar ta Qatar suka rawaito Firaministan kasar, Ahmed al-Mahmud na fada.

Shugaban kasar Sudan, Omar Albashir Reuters/Mohamed Nureldin Abdallah

“Wanna yarjejeniyar za ta bude hanyar tattaunawar gaskiya tsakanin bangarorin biyu.” Inji Mahmud.

Firaministan kasar ya bayyana cewa kasar ta Qatar za ta shirya wani taro a ran bakwai ga watan Aprilu domin neman tallafi ga kasar Sudan, wanda hakan zai taimaka mata wajen farfadowa.

Fiye da shekaru bakwai Kasar Qatar na shiga tsakani a rikicin kasar ta Sudan, inda a watan Yulin shekarar 2011, gwamnatin Sudan ta saka hanu a wata yarjejeniya da wani bangaren ‘Yan tawayen kungiyar Liberation and Justice Movement.

Akalla mutane 300,000 aka kashe a Dafur kana sama da mutum miliyan daya suka fice daga gidajensu tun bayan barkewar rikici tsakanin wadanda ba larabawa ba da hukumomin Khartoum, kamar yadda Majalisar Dinkin Duniya ta bayyana.