Birtaniya za ta bai wa Najeriya fam miliyan 95 don bunkasa noma

Birtaniya za ta baiwa Najeriya tallafin Fam miliyan 95 a wani yunkuri na taimakawa kasar don bunkasa tsarin noman da zai jurewa tasirin matsalolin sauyin yanayi a kasar, matakin da ke zuwa dai dai lokacin da tuni manoman kasar ta yammacin Afrika suka fara ganin tasirin dumamar yanayi ga amfanin gonar da suke shirin girbewa a damunar bana.

Wani manomi a Najeriya. Fati Abubakar/RFI

Sakataren harkokin wajen Birtaniya, James Cleverly, da ke jawabi kan wannan tsari a gaban taron sauyin yanayi na bana wato COP27 da ke gudana a Masar ya ce akalla ‘yan Najeriya miliyan 4, ciki har da mata miliyan 2 ne za su ci gajiyar wannan tallafi don bunkasa sana’arsu ta noma da nufin samar da tsarin noman na zamani da zai jurewa tasirin matsalolin sauyin yanayi, a yayinda a gefe guda kuma ya rage fitar da hayaki mai gurbata muhalli.

Gwamantin Birtaniya ta sabunta aniyar tata ce a yayin da ta ke sanar da kari a kasafin kudi na shirin yaki da sauyin yanayi zuwa Fam biliyan 1 da rabi a shekarar 2025.

Cleverly ya ce kasarsa za ta bai wa nahiyar Afrika fifiko a shirinta na taimakawa muhalli, inda ya kara da cewa ta shiga hadaka da bankin bunkasa nahiyar Afrika don samar da wata sabuwar kafa da za a samu kudaden ririta yanayi wadda za ta ci gajiyarta.

A waje daya kuma, magatakardar Majalisar Dinkin Duniya, Antonio Guterres ya yi kira ga shugabannin kasashen duniya su ribanya kokarinsu wajen bunkasa tsarin da aka shimfida na yakar sauyin yanayi.