Mashakon Diphtheria ya kashe mutane 10 cikin 91 da suka harbu a Jigawa

Ma’aikatar lafiya ta jihar Jigawa a Najeriya, ta tabbatar da barkewar annobar mashakon Diphtheria da zuwa yanzu ya kashe mutane 10 cikin 91 da suka harbu.

Wani yaro yayin karbar rigakafi. AP - Thoko Chikondi

Babban sakataren ma’aikatar lafiya na jihar Dr Salisu Mu’azu yayin jawabinsa gaban manema labarai jiya juma’a a birnin Dutse ya ce annobar cutar ta Diphtheria ta fantsama a kananan hukumomin Kazaure da Jahun.

A cewar jami’in tuni aka aike da samfurin mutane da dama da ake zaton sun harbu da cutar don gudanar da cikakken gwaji a Abuja.

Babban sakataren ya bayyana cewa yankunan da cutar ta fi tsananta, yankuna ne da aka samu karancin alluran rigakafin cutuka ga kananan yara.

A cewar Dr Salisu, gwamnatin jihar ta Jigawa ta dauki matakan rigakafi ga yankuna da dama tun bayan tsanantar cutar ta Diphtheria a jihohin Kano da Yobe da ke makwabtaka da ita.  

Dr Salisu Mu’azu ya ce yanzu haka suna dakon isowar alluran rigakafin cutar don bayar da matakan kariya ga al’umma musamman a yankunan da aka samu bullarta.

Alkaluma sun nuna cewa galibin wadanda suka harbu da cutar ta Diphtheria kananan yara ne.