An bukaci a haramta cin naman Kare da Mage a Switzerland

Kungiyar da ke yaki da cin zarafin dabbobi a Switzerland ta  bukaci a hana al’ummar kasar kashe karnuka da mage suna cinyewa, sakamakon yadda yawancin al’ummar suka mayar da cin naman dabbobin abin marmari musanman a lokacin bukukuwa.

Kasuwar Naman kare a Turai webecoist.momtastic.com

Shugaban kungiyar da ke kare yancin dabbobi  ya ce akalla kashi uku cikin dari na al’ummar kasar ne ke cin naman karnuka  da mage a matsayin cimaka mai armashi,  inda ya ce wasu ‘yan kasar na cin naman wadannan dabbobin gida ne a matsayin maganin sanyin kashi a lokacin bukukuwan  kirsimeti.

Wannan  ya sa yanzu kungiyar ta tashi tsaye wajen ganin an hana wadannan  al’addu na cin zarafin wadannan  dabbobi na gida a matsayin al’ada ko magani.

Wani dan siyasar kasar ya sheda wa kamfanin dillancin  labaran Faransa cewa,  babu abin da majalisa za ta yi, sai in har al’ummar kasar sun bayyana rashin amincewarsu, da wannan cin zarafi da ake yi wa Karnukan da mage a kasar ta Switzerland.