Raul Castro na Cuba ya kai ziyara a Faransa

Shugaban kasar Cuba Raul Castro ya fara ziyarar aiki a Faransa a yau Litinin, ziyararsa ta farko a kasashen Turai da ake ganin wani mataki na farfado da hulda tsakanin kasar kuma da kasashen yammaci.

Shugaban Cuba Raul Castro tare da Shugaban Faransa Francois Hollande AFP/ADALBERTO ROQUE

Raul Castro mai shekaru 84 wannan ce ziyararsa ta farko a Turai tun lokacin da ya gaji yayansa Fidel Castro a 2006.

Tun a ranar Assabar ne shugaban ya isa Faransa, kuma wannan na zuwa ne bayan Cuba ta sasanta da Amurka da suka dade suna gaba da juna.

A lokacin da ya ke karbar bakuncin shi, Shugaban Faransa Francois Hollande ya danganta ziyarar a matsayin wani mataki na inganta hulda tsakaninsu da Cuba.

Ana sa ran Shugaba Castro zai sanya hannu kan wasu yarjejeniyoyin kasuwanci tsakanin Cuba da Faransa.