Abramovich na cikin tsaka mai wuya bayan kwace kadarorinsa a Birtaniya

Bayanai daga wasu majiyoyi kwarara wadanda kawo yanzu ba a tabbatar ba a hukumance s un ce hamshakin attajirin nan dan kasar Rasha Roman Abramovich ya shiga mawuyacin hali tun bayan da gwamnatin Birtaniya ta kwace kadarorinsa a makwannin baya, sakamakon mamaye Ukraine da kasarsa Rashan ta yi.

Roman Abramovich hamshakin attajiri dan kasar Rasha da ya mallaki kungiyar Chelsea. AP - Martin Meissner

Yanzu haka dai rahotanni sun ce, Abramovich na shirin fara tuntubar abokansa attajirai domin samun aron kudi cikin gaggawa.

A halin da ake ciki dai, Abramovich na kokarin sayar da kungiyarsa ta Chelsea, duk da dai babu tabbas kan tsarin da za a bi wajen aiwatar da wannan ciniki, ba tare da gwamnati ta karbe iko da kulob din da ke birnin Landan ba.

A cewar wani rahoto da jaridar Sun ta buga, Abramovich na neman aron zunzurutun kudi kusan fam miliyan daya domin cigaba da biyan wasu hadimansa albashi.