Macron ya kaddamar da kidayar kwanakin gasar Olympics ta Paris 2024

Shugaban Faransa Emmanuel Macron ya kaddamar da kidayar kwanakin fara gudanar babbar gasar Olympic ta Paris 2024 a daidai lokacin da hukumomin kasar ke rige-rigen inganta fasalin hanyoyin sufuri na birnin Paris. 

Shugaban Faransa, Emmanuel Macron da magajiyar garin birnin Paris Anne Hidalgo a wajen gangamin sanarwar gasar Olympics ta 2024 a watan Yunin 2017. Reuters/Jean-Paul Pelissier

Mahukuntan Paris na Faransa na son gudanar da gagarumin bikin da ba a taba ganin irinsa ba na bude babbar gasar ta Olympic, yayin da shugaba Macron ya karbi bakwanci masu shirya gasar da ‘yan kasuwa a fadarsa ta Elysee domin tattaunawa game da shirye-shiryen gudanar da ita. 

Shugaba Macron ya kuma  yi wa daruruwan ma’aikatan gwamnati masu ruwa da tsaki jawabi a shalkwatan jami’an ‘yan sandan Paris da ke kusa da gabar kogin Seine duk dai karkashin shirye-shiryen karbar bakwancin gasar ta Olympic. 

Shugaba Macron ya kuma yi tsokaci kan aikin tsaftace kogin Seine wanda ya gurbace soasai a daidai lokacin da ya rage kwanaki 500 a fara gasar ta Olympic. 

Mutanen birnin Paris sun jima suna fatan a gyara wannan kogin ta yadda za a ci gaba da yin iyo a cikinsa, inda har a 1988, tsohon shuganban Faransa Jacques Chirac ya yi alkawrin gyara kogin cikin shekaru uku, amma hakarsa ba ta cimma ruwa ba. 

Sai dai a yanzu, ana ganin babu makawa cewa, za a gyaran kogin na Seine saboda Faransa na son a gudanar da wasu wasanni na iyo a kogin  a yayin gasar ta Paris 2024 kuma tuni aka ware euro biliyan 1 da miliyan 400 saboda tsaftace kogin kadai.