Taiwan ta gamu da mummunar girgizar kasa mafi muni cikin shekaru 25

Akalla mutane 9 ne suka rasa rayukansu a girgizar kasa mafi muni ta baya-bayan da aka samu cikin shekaru 25 a Taiwan, sannan akwai wasu sama da 700 da suka samu raunuka.

Wasu gidaje da girgizar kasa ta shafa a Taiwan. © AP

Hukumomin kasar sun ce, jami’an bada agaji  na ci gaba da aikin ceto wadanda suka makale a cikin gidaje da dama da lamarin ya shafa.

A cewar wani malamin asibiti a Taipei, Chang Yu-lin, girgizar kasar mai karfin maki 7 da 2, ta afka wa yankin gabashin kasar ne da ke da yawan jama’a.

Girgizar da ake same ta a nisan kilomita 15.5, ta faru ne a daidai lokacin da mutane ke tafiya aiki da zuwa makaranta, wacce kuma ta haifar da baraznar tasowar tsanami a kudancin Japan da kuma Philippings, duk da cewa daga baya an ce ta kau.

Yadda jami'an bada agaji ke kokarin kubutar da wadanda suka makale a girgizar kasar da aka samu a Taiwan. © AP

Wani hoton bidiyo ya nuna yadda jami’an kai dauki ke amfani da tsani, wajen kubutar da wadanda suka makale a gine-ginen benaye ta taga.

Jami’an  kashe gobara sun ce har yanzu akwai kusan mutane 60 daga cikin kusan 77 da suka makale a hanyoyin karkashin kasa da ke arewacin birnin Hualien, cikinsu kuwa harda Jamusawa biyu.